Thursday, June 28, 2007

要讚的服務

落大雨時經過Gio Ladies,避雨之餘都順便逛逛。一踏上二樓,售貨員立即送上兩張紙巾跟我說:「小姐,先抺一抺身上既雨水先,唔係會凍親架!」嘩!今時今日的服務態度,實在太好。什麼H&M,叫職員(因為我唔覺得佢地係售貨架,只係齋返工,無heart果隻)去找適合呎碼都懶理你。(坦白講,銅鑼灣的連根拔也好不了多少)

故事還未完,我手提一個巨型包包,又有另一個shopping bag放滿東西,售貨員再問我:「小姐,不如我幫你放起個袋,等你可以慢慢睇嘛,好唔好?」各位留意,這位有禮的小姐,她問我:「好唔好!」,沒有夾硬來搶。本來只是避雨的我,順理成章放下包包,細心地全店走一圈,還拿了兩件衫去試。(女人就係咁,明明唔係買野都拎幾件去試)最後,因為沒有想要的顏色,而買不成。

但這店已經贏了我的心。

十年一覺

最近,除了熊貓hit,我想都是「十年」這個terms。
無線的一輯十年,每晚有不同主題。Blog界早陣了都hit起十年這個tag。就連今期「壹週刊」都寫十年人和十年事。
當中有好多故事可能你有聽過,又或者你有差不多的經歷,幾十段文章,就好似這十年的縮寫。

Mani姐的偶像工廠
張玉珊的減肥王國
蘇民峰的身家不是靠算命
大快活靠SARS發達
福臨門老闆見盡興衰
許秋怡北上登台發達了
事務律師專幫人搞債務重組而出位
上樓café阿貓先開
風水師大轉運
太子珠寶老闆靠自由行食胡
寫blog都可以搵錢
生意失敗去做補習天王
佘詩曼的同期港姐變身風水大師
稻香主席要做全行至yeah
詹瑞文教做戲救電影圈
的士八折黨
Model 界吹起中國風


97年是香港重要的一年,97後的十年令到香港人學曉重要的一課。
康泰老闆黃士心:「97前執錢執到腰骨痛,依家粒粒皆辛苦。」
這十年,大家都變了。

Wednesday, June 27, 2007

人見人打

我:今日大家都講中左六合彩會點,你呢?講黎聽下。
河老爺:有幾錢呀?
我:三千萬。
河老爺:吓!咁少!都唔夠買隊英超。發達梗係買隊波啦!
我:咁買隊南華囉!
河老爺:超!

* * * * * *

我:今日問河老爺,問佢中左三千萬會點。
傻強:佢又點賤呀?(果然出名係一個賤人)
我:佢話唔夠買隊英超喎。
傻強:妖!我頂!
我:佢話要十億至夠!
傻強:頂!@#$%$&*^#$%&@#
我:佢仲好認真咁話,三千萬最多夠買個後備龍門咋。
傻強:(噴!)@#$#%^%&*()&@^$*&%^@*&$*^*@^$

Tuesday, June 26, 2007

吹雞

如果我中左六合彩三千萬…

誠意邀請大家以這句為開首,一齊發白日夢。

由我黎先啦!!!

如果我中左六合彩三千萬…

1. 先捐一部份去做慈善,兒童癌病基金,保護動物組織等等。

2. 讓自己財政自由,買股票,買生意,買樓收租等等。再全力為組合工作。Yeah!!!

3. 留些錢給家人。

4. 多去幾個想去的地方,法國、意大利,以歐洲為主。

5. 請幾位友好,去東京狂吃一次。返到香港可以出書,又可以做生意呀!嘻嘻!

何謂豪爽呢?

今日聽到收音機一段花邊新聞,令我有好多暇想。
內容大致講述一位英國69歲老婦,上年十月中了一份七百萬的彩金(差不多一億港元)。得奬後訪問老婦會如何使用這筆彩金,老婦希望與家人分享所得,而老婦就只得一位哥哥。大哥的家人聽到消息之後,差不多每日都期待信箱會有支票送來,看看這位姑姐會送多少彩金給爸爸。到今年六月,終於收到支票了!全家人急不及待打開信封,看看支票有多少個零。數數先....一個.兩個.三個.完!無錯呀,就只有1000英鎊,相等於0.0014%。當家人全場尖叫時,反而做大哥的,就冷靜到不得了。傳媒訪問這位哥哥的感受時,他回答:「我這位妹妹一向都好節儉,當收到支票時其實我絶不出奇,而且還相信,她會將獎金存入銀行,自己只用利息而已。」而他的兒子,更將姑姐寄給他的支票影印後裝上相架,用意是表揚姑姐的「豪爽」。

你會如何使用六合彩獎金呢?(呢個題目,可以寫三千字的)

分獎金給你至愛時,又會點分配呢?

其實一個“姑寒”的人,只要他一視同人(包括自己),我又接受到喎!

哈哈,又開始發白日夢吧!

熱辣辣最好嘆茶

我對單欉有種偏愛。宋種、烏崠、新茶、舊茶也有收。單欉的意思是一棵,即是單一茶樹收成,單一處理才可以叫單欉。真正要做到單棵處理實在太難,部份流通市面上的是某一產區所出,集體處理的。單欉都像鐵觀音,有濃香及清香。濃香型的有一種“嘭嘭聲”的感覺,每一泡都強而有力。清香型的就有一份清幽,淡淡然的,你要細心品嘗,絶對可以訓練你的舌頭。他還比起鐵觀音多一份內歛。

嘻嘻!我現在當然在喝單欉!

獲利回吐

三年不發市,發市發三年。這幾年極少病痛的我,今個月的確要獲利回吐吧!早兩個星期因為獸醫診所的冷氣強勁,落雨帶幾隻貓主人入診所,吹一吹就學人感冒,還要病兩個幾星期。感冒差不多尾聲,我又開始牙痛。正確來講,今次是牙肉腫痛,痛楚直上頭頂。醫生立即幫我洗牙,清走牙石之後,牙肉感覺鬆好多。牙痛累我今日失去飲大紅袍的機會。好嬲呀!

Tuesday, June 19, 2007

游水的父親節

已經有一段好長時間,沒有和老爸游泳。以前他總愛帶我們去石澳或者清水灣,記憶中的童年夏天,總是在海灘渡過。今個父親節再與老爸暢泳,好爽呀!雖然你比以前老了,但心境好似反老還童一樣,看到你在池邊扮G4聽馬仔,好笑又開心,到沒有下注的場次,你又跳到泳池大展身手。

老爸!今個夏天,多來陪我游水好嗎?唔係游乾水喎!

Sunday, June 17, 2007

九龍城

想到要去九龍城,順手就買兩隻肉粽回家應節,最恐怖是新三陽好似被洗劫一樣,所有粽都賣完。咁有無鴨腎呀唔該阿叔?賣晒!!!我行過附近的南貨舖,肉粽無人問津,好利害的蘇絲黃呀!

但侯王道的新三陽或者永富對我來講,可以不去,而我的目標舖是Chill Club。看到citysuper的和牛正印西冷要收$260/100g,但Chill Club只售$206/100g(我是會員,有九折)。如果你買來做鐵板燒牛肉片,只需$198/100g。我買了幾件澳洲移民和牛,準備為父親節與老爸大吃一餐。

耍樂

傻強 : 耶.又係我!
我:咩又係你呀!
傻強:東圈打四舖,四舖我都有份呀...有份出沖!
我:(沉默...)洗牌啦!(扮無事啦梗係)

* * * * *

同屋主:阿蘇,你真係撒哈拉喎(語氣都相當冷靜)
上家的阿蘇:咩呀.....
同屋主:你一隻牌都唔落黎比我上,門清三番啫,我唔要都得架喎!
上家的阿蘇:嘻嘻嘻!!!

* * * * *

同屋主:自摸!>>> 洗牌
同屋主:自摸!>>> 再洗牌啦
同屋主:唉..我比你打啦,再拉就比阿豬打死我呀!
我:哎呀,我又自摸!原來唔關你事,係個位既問題呀!
阿豬:&%$Y&*%UO&%$#$%TE$%#@%$T#@!RE$#@#$

Friday, June 15, 2007

Blog

寫blog之餘,最近都有周圍blog下的習慣,我算是一位new blogger,還有好多blogger tools未試過。寫blog睇blog時會有好多發現的,最普通就會知道你朋友的生活動向,後期你會發展到去看其他人的blog,多數你會根據興趣或話題而看,好似好多blogger都以電影為blog的中心,又或者飲飲食食blog都是主流。一邊看blog,多多少少你都會對blog主有或多或少的認識,有時會留言,有時會送上一個email交流一下。

如今多如牛毛的blog,你們又有什麼好blog介紹給我逛逛呢?
Technorati Profile

Thursday, June 14, 2007

感冒+ 喉嚨痛=發燒

我:其實而家啲菌係毒左,定係個人老左,病極都唔好呢?
R:Both!!!!
* * * * *
傻強:喂!
我:喂(帶有極重鼻音)!
傻強:嘩!唔該阿牛呀
我:我係。(我居然認呀,呢個名好襯我把聲)

Monday, June 11, 2007

Bumbo Chair 上的豆豆

豆豆已經三個月大,比起初初出生,她開始表情多多,而且還會望著你笑,可愛到爆。豆豆媽買了一張Bumbo Chair給她,你看到她幾神氣。


一向都愛玩人家的BB,一玩到喊,就送回給豆豆媽,可以好不負責任嘛!

貓僕人

同屋主:其實我地要唔要都洗下耳仔呢?可能都有耳蚤架!!

我:係呀, 仲要食啲吐毛膏呀, 吸埋咁多毛?

週年體檢

週末天氣差,最慘還要帶幾隻肥貓去打防疫針。檢查之後,四隻貓都有耳蚤問題。兩年前肥波從竉物店回家後開始傳起,差不多每年體檢,都發現有耳蚤,所以未來兩個星期,同屋主與我,又要開始洗貓耳行動。相信我最親信的Bubee都會嬲兩個星期,兩位僕人要孤獨一段時間。

炮仔 6.13kg
肥米 5.5kg
Bubee 5.48kg
肥波 3kg (不合格)

三隻肥貓除了體重到達邊緣線之外,身體都好好,肥波有少少牙石,難怪體重都不能上升,要留意呀!

Saturday, June 09, 2007

Gough 40

對於就快離開中區,今日突然想跑上歌賦街,試一試阿蘇的介紹。
我好喜歡餐牌項目不多的餐廳,因為這樣代表小店的專心。
頭盤有好多款都想試,選了兩款。鮮吞拿魚沙律的芝麻菜新鮮,配上帶有微辣的醬汁,最鍾意吞拿魚切成小角,不會沾太多辣汁,味道剛好。然後再點了白酒煮青口,小小的青口好軟,肉質嫰滑,也很鮮甜,好想連湯汁都通通倒入口,好好味道呀!主菜點了豬扒,因為阿蘇介紹過豬扒嘛!老實講,肉質都可以,但比起青口,豬扒的味道我早已經忘記。主菜吃得少,因為想吃甜品嘛!甜品食左咩?都係算把,無謂提。相片?太有情調的餐廳,只拍到黑色。

Gough 40 Restaurant
G/F, 40 Gough Street
Central
28518498

Friday, June 08, 2007

荔枝菌

終於有機會吃到荔枝菌,廣東羅崗人(出羅崗橙的地方,有印象嗎?)會帶點鄉音說成荔枝芹。這種菌菇瘦瘦長長,生長在荔枝樹附近而得名,是不是野生我就沒有研究,但只知道荔枝菌每年只在六月收成,六月底荔枝推出,荔枝菌就完了。
住在附近的廣州人,都專程直接找農家訂菌,下午採菌,七點就開飯。荔枝菌可以用來煲湯,菇味流入湯水當中,清香鮮甜。不過我反而喜歡清蒸,將菌清潔過之後,直接放上碟,洒少少鹽花,隔水蒸即成。蒸過的菌有種甘香,而且沒有溫室菌類的酶味,這份清甜,有點似新鮮瓜果。好好味呀!

七個人鯨吞四斤荔枝菌,還有蒸雞、清菜、肥鱔、煲仔雞飯、煲仔黃鱔飯、椒鹽田雞、排骨、沙螺。在農家吃雞就最開心,走地雞必定無錯,因為牠們就在你身邊經過,又肥又大。
好味又珍貴的荔枝菌,成為$120/500克,貴死人呀!我還帶了1kg回家煮。清蒸又得,用來煮意大利粉也不錯吧!

Wednesday, June 06, 2007

今朝仲瞓到矇查查時,突然覺得床下面有聲,同時又feel到有野頂下頂下咁。原來係肥波,佢跳左去床下底玩(我果張係油壓床),想出黎時又被困住喎,最後咪係到喵喵喵叫救命。到而家,我都唔明佢點解可以入到去床下底玩架?真係要問問Adam Cheng。

Tuesday, June 05, 2007

四十年代紅印

普洱茶炒得如火如荼,什麼茶都被炒到上天價。要飲到印級茶就如同limited edition的it bag,有錢也未必買到。

上次多得CT才有機會試過藍印鐵餅的威力,印象好深刻,無論質地、味道都實在攞你命三千。(好浮誇咩?)

今日兩個又瘋狂一番, 主角是早期紅印,這一餅茶已經有60幾年陳期。茶餅只有240克重,薄薄的一餅(好名貴呀)。茶湯是通透的栗紅色,水質没有鐵餅的稠稠,是比較化。差不多到七.八泡就出到甜味,舊茶味當然濃,始終都已經幾十年變化。最明顯到當甜味走出時,舌底就開始生津,最得意我感到舌尖有少少痺痺地。

不過,你問我要用天價來試這餅茶,的確只是有錢人+普洱粉絲至做到(缺一不可)。再選,我還是會飲藍印鐵餅,因為他實在給我「嘭.嘭」聲的感覺。紅印,實在over price得很呀!幾錢??? 足夠訂一個Birkin或者一個限量版熟客仔至買到的LV。

多謝CT!

Monday, June 04, 2007

短髮貓

今個夏天,我已經換了一頭短髮,清爽到不得了。
貓咪們近日瘋狂甩毛,我想都是因為天氣太熱。為了令他們涼快一點,今日就與同屋主為他們剪毛,一向都只在肚皮位落手,清爽之餘又不失形象嘛!

事成之後,的案發現場。



當然,同屋主之後逃之夭夭,留我一個人負責清理。

Friday, June 01, 2007

今個星期

熱死人的五月,每次出街都要準備一大支清水,返回辦公室更加需要幾泡青茶降一降溫,最近真的感到清茶一小杯,好比連啪幾罐可樂,真正解渴是舌面上的生津,心靜原來會自然涼。火氣,我都要控制一下,否則這個夏天有排我受呀!

* * * * *

公司Logo已經設計了初型,好滿意。

* * * * *

大熱天時,阿公居然想去九記食牛腩,對於臨別中區,當然要再去一去,午飯時段没有爽腩,但湯仍然好味。

* * * * *

對於炎夏,我準備了一頭短髮。新髮型師十分用心,最滿意他很專心及不多言的性格。最怕多咀的髮型師。

* * * * *

今日午餐時講到灣仔日街的SpoiL,Cy要在我離開中區前去一次,算是歡送我吧。阿公都忍不住加一句:車,佢咁自由,幾時返黎食都得啦!對,人馬座絶對是愛自由的一群嘛!其實,Cy都是想找個藉口,去試新餐廳。講到飲飲食食,奉陪到底!