Monday, May 28, 2007

吃牛,都是外國的好。澳洲和牛、美國安格斯、日本松板牛、意大利托斯卡尼牛,總之一大堆都是外面的品種。中國,最多有蒙牛奶,談的都不是牛肉。

吃牛,我是肉眼派。因為她質地軟,咬兩咬就吞落肚,好滿足。最怕要咬咬咬,咬得時間越長,肉就變得無味,感覺好可憐。

吃牛,我要吃肥。所以我都會變肥,因為太愛吃牛,自己的身材早已放開,有好牛肉吃,比起照鏡開心百倍。

吃牛,我還愛吃她的副產品,芝士。但吃得多,第二朝早我的鼻會爆炸,放肆後的報應。

吃牛,即時想起幾個好地方。百利.Toraji.Chilli Club.Steak House.Lawry’s.Morton。

哎呀.寫到好肚餓呀!

我有一個變態朋友。

我:今日好熱呀,出左幾次街,成身都濕晒!
友:係呀,我坐係屋企都爆汗。
我:中午時份係最熱,你唔開冷氣?
友:嘩!開冷氣電費好貴架。我咁慳,梗係唔開啦。而且我一陣都出街。
我:你出去都熱啦。
友:我坐的士咪唔熱囉!
我:妖!你咩理論呀,開兩粒鐘冷氣就貴,坐幾廿蚊的士就OK。
友:嘻嘻,你都知我變態架啦。

病人同屋主

同屋主因為以「瞓黎頸」為名,借啲易就逃避做家務的責任。指指點點,要我做東做西。
喂!你去清砂盤。(平時佢做架嘛)
喂!成十點啦,快啲開飯比班貓咪食啦,佢地好肚餓呀!(都係佢平時既工作)
喂!幫我摸牌呀,隻牌好遠呀!
作為一個病人,他仍然有氣有力地打麻雀,還會吃混一色自模,吹漲!

愛兒李咁曳

人總有偏心,最多没太出面。



你問我幾時愛他,總會答:你乖咪愛囉,唔打爛野時咪愛囉,又偷野食,又打爛啲茶壺時,點愛唧?
同屋主會冷靜地加把咀搭嗲:佢就係咁,你至咁鍾意佢唧!
妖!唔好咁清醒得唔得呀?

茶杯

飲茶的人,向來都會對茶具有某程度上的要求。遇上好茶杯好茶壺時,你要付出的代價也不少


公司的小茶盤上,我有一隻心頭好。這隻杯可放25-30cc的茶,比起一般小茶杯,算是較大的。一邊工作,一邊飲茶,大一點會方便好多。


好的杯,首先要薄,杯口要飄。
做到杯薄,必須要用好的陶土,密度高才可以拉得薄,而飄口杯就算茶有多熱,你也不至於燙到手。當然,我也付出不少代價至得到這隻杯吧。

Tuesday, May 22, 2007

搬走中環

六月中公司會搬到炮台山,比起中環的確有點不便。難為了一班小同事,有的住在青衣、東涌、天水圍,就算住在沙田,也要多用半小時來上班。大家還不及難過之時,已經在討論新公司的裝修,例如老闆房間在那在位置,部門主管又坐在那裡,最關心是周邊的午飯選擇等等。最好笑大家在討論,新公司洗手間在正中央,如果肚痛拉屎時,全公司都會知道。頂....唔通要出街借厠所?

Monday, May 21, 2007

離奇失錶案

P又遺失了名錶,無錯“又”一次,當然心煩得很。作為一個壞蛋朋友,當然沒有好言相贈,反過來只有尖酸刻薄一番。更加向她提議,買過一隻新錶就好。反正新款名錶多的是,勞力士都勾勾地啦!

Bingo,我對朋友從來都沒一句好聽說話。最近還立志做真小人。老來報應都只有得貓貓狗狗能和我作伴吧。

Friday, May 18, 2007

J'aime les petits gateaux - Deux

L’Atelier的petit gateau仍然好吃。

「Fleur d’orange」一口咬到軟滑的牛奶朱古力mousse,中間有橙花水味的吉士餡,我好鍾意。每次吃到橙花水,就想起Brioche,橙花水配朱古力,好法國呀!
請問邊到有好味的Brioche賣呢?吊癮呀!



「Chocolat Cappuccino」豐富的組合,外層的朱古力Mousse,包著咖啡味餡,Macaroon及合桃作為餅底,份量剛剛好。

Petit four 的小brownie也好好吃,買幾包帶到咖啡店作伴點,真係嘆死人呀!

Wednesday, May 16, 2007

何妨

居士年來病酒,肉食百不宜口。蒲合與波酒,更著茼蒿蔥韮。親手,親手。分送臥龍詩友。【全宋詞】 --- 趙長卿

大家一齊戒酒,肉食百不宜口。鮑甫與蝦球,望實依開個口。冇修,冇修。分送隔離親友。 --- 黃霑

年來有病無酒,乜病都要感受。腰痠與背痛,更著不能起頭。戇尻,戇尻!可知配額已夠。 --- 倪匡

真假好壞人

什麼樣的人算得上是真好人? 能人前人後待人好的應該是了。
什麼樣的人算得上是假好人? 人前待人好,人後待人差的應該是了。
什麼樣的人算得上是真小人? 人前待人差,人後待人也差的應該是了。
什麼樣的人算得上是假小人? 人前待人差,人後卻待人好的應該是了。
不要問我是那種人,我的志願是想做真小人,輕鬆自在,但有時做不來,結果做了假好人,心裡不太舒服,還是要立定決心,做我的真小人好了!
--------------【人前人後待人好】--Keith To

我再加幾句。

好人的定義又如何呢?
今日做了壞人,明天因為他的壞,最後對你好。
今日做了好人,明天因為他的好,最後對你壞。
慈悲心,霹靂手?
霹靂心,慈悲手?
無錯,知易行難。所以向來成功都不容易,要努力做真小人!

Tuesday, May 15, 2007

J'amie les gateaux

經過昨天的刺激,今日我要買蛋糕吃。

走上擺花街去Antique,吃了一件Mille-feuille,不能止咳。好辛苦呀!!

明天我要去L’Atelier。

Hofex 2007

我好鍾意去Hofex。因為…….找到重要的工作資料,很少失望而回。

還有…. 試到西班牙黑豬火腿、德國香腸、意大利咖啡、法國紅酒、澳洲海鮮、日本清酒、中國普洱、台灣麻薯、英國芝士、比利時朱古力、馬來西亞奶茶等等等等。

也有不能吃都會令你流口水的Combi Oven、大冰箱、Expresso Machine。



My : 我要有兩間屋,一間屋係廚房,放晒呢啲好野。
我:放係間屋做咩,開間舖,做埋生意,唔係啲野點用呀?

Sunday, May 13, 2007

週未狂熱

零晨一點,今次全部柯打生菜魚肉,LF照舊買要去皮鴨肶,老闆見到熟客,4碗魚肉加4隻肶(大家都認為鴨肶是Free的),多謝$78。不會吃到口渴,有果皮香。

碗仔翅提議買回家中,加少許麻油,比企街吃更好。(資料由豬妹提供)

* * * * * * * * * *

我 : Cy你牌面好勁喎!叫糊未呀?
Cy : 點講得你知架!
我 : 講啦,呢到個個都好老實,Sensei都話你知佢叫五門齊啦!(理直氣壯,厚顏無恥)你真係叫糊,我就唔打呢隻。
Cy : 哎呀!未呀,未叫糊呀!

最後成功地沒有出沖。

* * * * * * * * * *

老豆 : 個茶壺入滿水都會浮架!我試比你睇!
我 : 好好好。(睇緊電視。)
老豆 : 你過黎睇下,重可以暫停,唔出水住,係咪好勁呀!
我 : 勁勁勁。
老豆 : 你快啲黎玩下啦。(佢拉我入廚房。)
我 : 老豆,其實個個紫砂茶壺都係咁架。
老豆 : 係咩?咁不如攞晒出黎試下。
我 : 老豆,我係咪細個時煩得你多,你而家還拖呢?

我的大哥,在旁邊狂笑,沒出口相助。
而老豆,佢反老還童呀。

Friday, May 11, 2007

辦公桌

這是公司裡的小型茶間,就在我的左手邊。


右手邊,就放滿茶葉。最少有幾十款。不是每一款我都喝,只有龍井、單欉、鐵觀音在大部份時間,得到我的竉幸。普洱?梗係入去事頭間房到飲啦!

神棍 + NLP

與阿公例會時,談到如何看一對情侶是否能夠終老。而我總有一套看法,十居其九都準確無誤,其實我不是神棍也不是直覺,是性格分析。白頭到老,不一定是幸福,太多一生一世的伴侶,都是吵吵鬧鬧地過的,這是一個方法,一個生活的態度,未必傷感情,未必要離婚。有人夾住A,希望找B,到老到死,原來這個B都未曾出現過的。你有一段什麼關係,都基於你的性格所得。只要知道自己性格影響關係就好。

最希望凡事看得通透,抽離一下去看所有事都會變得更立體。

Thursday, May 10, 2007

投錯胎

網絡上給我發現一班熱愛普洱茶的歐洲人,他們以法國人為主,有部份更加住在台灣,有上山採茶的經驗。其他大部份身處家鄉,從網上得到資料,學習欣賞普洱和紫砂茶壺(你屋企都未必有啦,係咪先!)。這班人對國家的知識比我們還要多,不單只在品茗,還有對國家的文化、地理,都比我更熟。有時都好「羞」,香港人知道原宿Bathing Ape地部,多過知道雲南在那個方向;飲啤酒汽水的人總比起飲茶的多。
究竟他們是投錯胎的鬼佬,還是我們吃英國人的奶長大呢!

Tuesday, May 08, 2007

平常生活

食完一碗淨雲吞,加一碟薑蔥撈麵,另上一碟油菜。
兩個小時後,又見肚餓。生積?
現在,咬住餅仔來配烏崠單欉。頂得幾耐呢?

Monday, May 07, 2007

茶包

為了要幾個立體茶包做樣板,專程去「無印」買了兩包茶,其中一包是香橙朱古力味紅茶。

一打開包裝,就有好濃郁的朱古力味,細心再聞,就跑出香橙味道。老實講,我有點怕類似的新口味,購買絶大部份出於好奇心,肯定不會有下次,因為心裡想到,總不及其他青茶種。就連試都不太想試。最後,叫隔離位的小同事為我測試一下。大家聞到這個味道都極為好奇,感覺好似沖泡後會變成熱朱古力(實在太天真)。一般這類茶,只會提供香氣,而入口味道介乎紅茶及果茶之間。(我都試過無數這類產品,什麼雲呢拿茶,焦糖茶,好奇心重嘛!)大家對味道都感到一般,但好玩度十足,吱吱左左就消磨了15分鐘。

如我所想,烏龍茶茶包比這類「好玩茶」實際得多。

Sunday, May 06, 2007

Tempura @sushi 廣

又吃天婦羅。K帶我們來到Henry House,這裡店面不算大,但有兩層,一層有sushi bar,另一層就有tempura炸鍋。
海蝦天婦羅比稻菊還要貴,覺得不值,所以沒點。反而K介紹大家試一試日本大蜆。大蜆有少許香草調味,連殼拿去炸,質地爽脆,也很鮮甜。另外蕃薯也很甜美。目光魚質地嫰滑。其他炸蝦(蝦頭有點油味),舞茸菇都只是不過不失,沒太多驚喜。

如果要吃好的天婦羅,還是會選稻菊,環境食物都比這裡好,價錢也相差不太遠。埋單看到大蜆價值$120一隻,這個會再吃呀!没有點魚生,因為V最怕。也沒有放題大吃,因為其中兩個的食量只是我的一半。四個人(三人食量)共消費$1600。

招財貓

炮仔跳上傻強大腿,竉幸了半舖牌時間,就跳走了,然後傻強大叫失戀。頂,原來情場失意,賭場得意。你跟住拉我三舖庄呀Auntie!

又有一舖,炮仔跳上LF大腿,貓頭探上來望兩望,然後摸牌就暗摃,收三個底。

炮仔,受歡迎指數,又升一級。

Saturday, May 05, 2007

Henri Charpentier

打開Henri Charpentier的Petit á Petit就有一陣香濃而新鮮的牛油味,十六格內有九個款式,又香又脆,實實在在的質感,簡簡單單的配搭,每一口曲奇都感受到做餅人的認真。黑/白朱古力、芝士、焦糖合桃、紅桑子或榛子餡全部都好吃。你全部吃到原材料的味道,不是藥水味的香精。


這份感覺,不是車厘哥夫、Jenny Bakery能帶給我的。土炮孖芝蓮混人工雲呢拿香油貨色,味道千篇一律,sell你買鬆化,孖芝蓮當牛油,咬落無層次。咪就係鬼佬食唐餐sweet & sour pork。香口+顏色+一咬就散。

多謝高島屋收歸其下,不至要去巴黎掃貨。還有多謝CM的送貨,我先有得食。

Wednesday, May 02, 2007

意大利咖啡吧

標榜為正宗意大利咖啡吧,裝潢又的確有點像樣,但可惜,咖啡只是暖,不夠熱。一份三文治加Cappuccino 多謝$88。會再給他一次機會,但只限咖啡。

懶貓門神


打麻雀背後的動機

五一假期的前夕,做了一件瘋狂事。
大家為了食宵夜,居然相約打麻雀。

尖東有一家車仔檔,售賣碗仔翅和生菜魚肉,由於是「走鬼檔」的關係,不是每晚都可以找到的,你想試就要撞撞機會。老闆大約晚上十一點開檔,不到兩點就會售罄。因為他的碗仔翅和魚肉湯,都比外面的特別。他檔口就在鹿鳴春附近,老闆買入下欄的片皮鴨身,用來煮魚肉湯,而部份燒鴨肉放入碗仔翅中取代雞絲。如果你想多要一隻片皮鴨肶只需$5。鴨肶就在大湯煲內撈出,肉已經煮到一咬就化開的地步,吃得過癮。鴨湯用片皮鴨煮,難免有點肥膩,去吃這餐宵夜,你真的需要一點點膽量。魚肉湯的生菜如果多一點就好,鴨油香,煮起菜來特別美味。

麻雀腳豆小姐,還打包了一份碗仔翅,回家放上海麵煮多一餐。「梗係啦,唔係咁容易撞到佢開檔,有時又比差佬拉o左,有得食好食!」

點解又與打麻雀有關呢?
大佬,無開檔都可以都有牌打,如果未開檔又可以邊等邊打牌嘛!記得最少五個人成團,其中一個負責買外賣及「鄧腳」。成件事係有計劃過架。嘻嘻!

焗春雞

愛買春雞作為存貨,貪方便,貪容易存放,貪肉質嫩滑而且不會太肥膩。雪雞當然不及鮮雞,所以要用「鬼佬」方法來煮,味道較為配合。今日,是覺得是有史以來做得最好的一次。

法國春雞 1隻 (約390克)
洋蔥 1個
薑片 少許
鹽 1茶匙
黑胡椒 少許
乾雜香草 少許
蒜泥 2粒


1. 部份洋蔥及蒜泥放入雞肚內;洋蔥切圈放在焗盤底;其他調味料塗滿春雞全身。
2. 放入已預熱至220C的焗爐內,烤35分鐘。

***雞汁流出浸透洋蔥,洋蔥甜味滲入雞肉,美味無比。