同屋主是一名「隊爆王」。
例如有喜愛的衣服，他可以同一款式買夠五件，而每天都穿著，直至悶死為止。經典有他的build-in外套，秋涼20度會穿又可能零下十度都會穿，不理天氣，不理場合。
另一例証，他好喜歡吃曲奇餅，遇到喜愛的口味，可以連續吃十盒，直至想嘔為止。經典是一次過吃一大罐澳門樂宮曲奇餅（大約有80塊），然後覺得心口痛才停止。
成名作~~~ New York Cheese Cake整個不用切開，獨自抱住坐在電視前送英超足球賽，Clear。
還有，只要遇上他喜歡的餐廳，又會一連去兩三個月，直至餐牌上的東西都試過（又翻炒過）為止，總之有一種「隊爆」之意。
今日，我與同屋主去油麻地生記吃雞粥。
同屋主：舊雞好好味呀！有酒醃過架？
我：嗯！
同屋主：同你交換，我想試你碗魚腩粥。
我：嗯！
同屋主：你比多舊雞我呀，好嗎！（咁交咩換啫）
我：嗯！
同屋主：呢間野開左幾耐呀？（入正題）
我：都好耐！
同屋主：你做咩唔帶我黎食呀？
我：早排天氣太熱，食完都一身汗啦，點食喎？！你又話人多，唔排隊！
同屋主：頂！我唔知咁好食嘛！聽日再黎食！
我心知這個「聽日」，可以是明天，可以是未來三個月。
九龍生記粥麵
油麻地東方街9號
27706099
星期日休息
6 comments:
這和中環的是同一家生记嗎?
係呀. 同上環果間一樣
水準都一樣好
嘩, 我勁驚"隊爆王"! 我身邊都有一個, 雖未至於隊爆, 但可以連續每星期都去同一間嘢食飯, 我已經想死! 我超級怕悶怕重複, 最好個個星期都試吓新嘢, 偶然食番同一間...
mad dog, 我已經習慣左la! 好彩唔係日日同佢食晏咋. hehehe
真係"啤"一聲，我有個朋友又係咁，次次同佢出來食野都係打邊爐，差唔多好既差既打邊爐都食過，又唔見佢爆暗瘡先好野。
虎茶你練左幾耐先習慣呀?????
小張, 今日又係有朋友問我點解可以習慣到?! 其實我無專登習慣, 只係如果岩食就一齊去食, 唔岩食大家分開搵食. hehehe, 我好專重同屋主有私人空間的. 無謂迫自己嘛. 一般黎講, 佢食一個月到就會悶, 到時咪又可以一齊食飯囉. 係搵食既過程, 大家一齊去試食, 都好開心架.
Post a Comment