公主落難日記

這幾天差不多每個朋友都問我肥肥公主的落難近況。

包括我老媽

長途電話對話
媽：阿肥點呀？我好掛住個孫呀！（點解阿肥係佢個孫呢？我唔明喎！）
我：你第一句就問佢，問下我都得掛？！（我至係佢個女呀！）
媽：佢點呀？有無食野？有無飲水？有無去厠所呀？（當聽我唔到的）
我：要我呵住至食少少咋，仲要食罐頭，衰到死
媽：你比罐頭佢食啦，佢唔同你啲貓呀！佢每日要食一罐吞拿魚架！（我家五小福只分一罐，天堂與地獄）
我：知道o刺！
媽：佢夜晚瞓係邊到呀？記住舖好佢用開張毛巾比佢瞓呀！
我：你句句都問住佢，有無搞錯呀？！
媽：你會行會走，問你做咩呀？梗係我阿肥緊要啲啦！
我：頂！！！

* * * * * *

媽：阿肥有無同啲貓一齊玩呀？
我：玩？！？佢打阿炮呀，幾衰呀！又啡Bubee仔！大膽呀佢！
媽：係呀係呀！佢平時發痺氣時都會鬧我架！你由佢啦，佢以為我唔要佢，心情唔好嘛，就下佢啦，無咩事就留係屋企陪下佢，唔好周圍去，佢習慣有人陪架。
我：我唔駛返工咩，陪佢！
媽：你放工好即刻返屋企陪佢，唔好去夜街，佢唔鍾意架！（老媽！你閃去澳洲三個月喎！？）
我：咪玩啦！佢咪有貓陪佢囉！（意圖搵貓頂替僕人工作）
媽：唔同架，總之你多啲時間陪佢啦！佢好乾淨架，記得密啲剷砂盤，唔係佢唔去厠所你就死！
我：係！係！係！