Le Pain Grille

開店初期，聽過不少「鬧爆」的食評，入舖前都有心理準備，沒期望太高，只是中途站休息一下，吃個下午茶。


我點了一份Tea Set，整體蛋糕的外觀只是一般，味道最多合格，不過不失。

河老爺點了一份法式三文治加Cider。法包，出奇地好吃，三文治有法國風情。
法式芥辣搽滿麵包，帶起整份三文治的味道（意料之外）。

晚飯有galette供應，我想下次去試一試。

Le Pain Grille Agnes B Cafe
銅鑼灣禮頓道111號地下
2577-2718

李有米

阿二肥米

為食郊遊

一早起身（已經十一點，都早？！）約齊人就出發去嘉道理農場。








傻強：呢到有無得飲茶架？
豆：小賣部有咩野食賣架？
河老爺：嘩！呢塊田種咩菜架？
我：嘩！磨菇呀，你估好唔好味呢？

當大家見到小賣部時，又撲入去搵有機蔬菜買（已經售罄！好慘呀！）。


點解去到咁遠，大家仲係掛住食呢？

粉絲迫巴士

今次Marc by Marc Jacobs 秋冬季新裝脫離了main line獨立行事，時裝我一向都不懂，不要以為會發表一輪什麼秋冬必買等題目。每次參與，只不過集中看人。除了明星名模好看，其實還有．．．．．　



這班粉絲，似在迫巴士嘛？

為食貓霸主

同屋主食蜂蜜蛋糕，佢又走黎食一份。
我食麵包搽肝醬，佢又食幾啖。
晚飯有蒸雞，佢又瘋狂跳上飯桌，趕極都唔走。
今日食綠豆沙，佢又飲左幾啖。
大佬，我無估到綠豆沙佢都岩架！呀！煲少少比佢地飲，清下熱都好，食乾糧多，熱氣嘛！（變成瘋婦了！）

傻吉，你比我好好地食餐飯啦唔該。

にほんごをべんきょうします

聽到衰神今年要考一級能力試（只有三個月時間），都激發起自己再讀書。應該去上課好，還是自已先溫習呢？（三分鐘熱度又來了！）

剪髮

去理髮你願意付多少錢呢？
每個人心目中都有個價目表，六七百元搞一次，對我來講是有點過份。
年初時髮型師要加價，
可能因為經驗多了，升職，
又可能因為生意少，老闆要追加，
剪頭髮，是生活的一部份，加價等同通漲，作為小市民的唯有變陣，
從好方面想，今次給我與同屋主一個好機會轉新形象，
我就在炎夏中換來一頭短髮，方便到極，
同屋主更利害，昨天找來sensei的理髮師，盛惠$68（如果買套票只要$50。阿蘇，不如你夾埋河老爺一齊買套票啦！）
坦白講，$68與$450的確有分別，但這種分別，沒有值$382。
洗錢態度要有，但我更奉行spend smart live rich。

慶公宴

趁傻曹的生日，就去探一探Andy，因為今個夏天的新菜式還未試過。阿曹不愛鮑魚，最後選四百元的菜單。

一向慶公宴的份量都好大，可能Andy提取了客人意見，所以今次夏天的菜單份量減了磅，以我的食量，大約兩個半小時之後，要到翠華「啪」一個奶油豬仔包，但各位放心，正常食客絶對足夠。

我最鍾意香茅海中蝦、濃汁煨冬瓜。燕窩香蕉卷果然真材實料，加上薑汁shooter好好玩呀！











慶公宴
中環蘭桂坊8-11號昌隆商業大廈10樓
訂座﹕2536-9773

丁蟹M

半年前
M小姐：哎呀！我又要買股票呀，買邊隻好呀？
我：買HSBC啦！你長線投資，有利息收，又穩陣。
M小姐：嘩！好貴喎？（我都唔知佢用咩黎衡量平定貴？）無咁多私己錢呀！
我：你算把啦，唔識唔好買呀！

一個星期前
M小姐：我買左股票！XXXX呀！
我：你早講嘛！我通知親戚朋友走晒貨先，你入市，死梗啦！
M小姐：係啦！我一買，第二日恒指就跌六百幾點。
我：都話你勁過丁蟹架啦！

今日
再證實M小姐的利害，港股再瀉多成八百幾點呀！

見醫生

Vet：耳蚤好番晒喎！
我：梗係啦，我差不多死咁濟呀！
Vet：嘻嘻．．（賤笑！）
我：你分明係整惑我地啦！
Vet：嘻嘻，啲客成日話我開藥唔夠好，其實係無跟足做啫。
我：跟足你講黎做，會連份工都無埋架！（好彩我打自己工啫）
Vet：嘻嘻嘻！

佢既藥係每日要洗四次耳仔，早兩次分別相隔一個鐘，晚兩次又係分隔一個鐘。想像一下要趕返工時，仲要早兩個鐘起身服待班大爺，實在係報應。無錯，我現眼報呀！

混血兒

是不是每段國際婚姻的夫婦，都必定有下一代呢？
因為品種優良？
還是他們特別愛小孩呢？
如果一個不愛小孩的人，又與一個「鬼佬」結婚，會改變嗎？

莫史狄

經過七仔門口，正想爆扭蛋機時，看到有一個小朋友。

細路仔：你無錢呀？eeee ar ar eeera rereaare (一輪小朋友專用外星話)
我：係呀，我無錢呀！
細路仔：eee ar….. ar…..ar…..
我：你係到等媽咪呀？
細路仔：唔係呀．．．．（帶有外星話的口音）
我：送呢個公仔比你吖！（我已經扭左幾個都係相同的，散貨中！）
細路仔：多謝！（又幾乖喎！）

當時都奇怪，呢個細路點解得一個人，唔通媽媽仲係舖頭買緊野？突然我背後有位男士走出黎，仲問我係咪識得呢個小朋友，我當然唔識啦！
原來呢位好心先生，收到太太的電話。佢太太早幾分鐘係對面馬路等車時，見到呢個小朋友企左好耐，覺得唔對路，就叫先生黎幫幫手（好感動呀，真好人）。
我地幾個人（包括七仔的店員），試圖問問小朋友住係邊啦，媽媽既手提電話號碼等等。好心先生十分有耐性。大家問左操外星語小朋友幾分鐘後，就有幾個人跑來，與小朋友相認。原來其中的Auntie幫朋友看管細路，但外星細路居然識打開閘門自己跑出黎玩，嚇到全家人四處搵，真係心都慌晒呀！

覺得舊村人情味濃，大家都會幫忙，感覺好溫暖呀！呢啲，係住荒島至有既環境。

Noro今天在保加利亞

黑咪Noro今年暑假又去了歐洲旅行，現在保加利亞。我每日都有去黑咪的blog看看他的最新相片，可以每年外遊的小黑咪，就好似五星級大鼠味王一樣．．．有Guts呀！

負能量

這兩天負能量超重，日日與各機關查詢及投訴。其實我不是和客戶服務人員過唔去呀！但生活在這個社會，又必須要懂得這些技倆。投訴令我變得頭腦超清醒，而且控制著每一句說話的力量，始終腎上線素的影響嘛！

我唔想咁呀！點解唔可以日日大快活呀？

食玩展

最近又流行「食玩」，令我想起友人曾經有一段時間熱愛做麵粉公仔，而大部份都是迷你品，適合作為dollhouse的配件。記得除了花卉系列以外，最有印象莫過於食物系列。牛角包、法包、日式湯麵都見過，像真度極高。食玩商Re-ment在新都會廣場有一個展覽，展出了好多新舊產品，部份更加已經停產。我最鍾意是有關食品的系列，包括日本土產、鄉土料理、西式甜品、外賣組、回轉壽司，好玩至小學生午餐飯盒也有。有部小販車，我真的好想買呀！如果大家有時間，不妨去看看。

炒雜碎

終於落雨，無咁熱呀！舒服晒！
* * * * *

傻強與豬妹都為下個星期的Lasik手術煩惱。醫生硬銷新科技，而兩位當事人就對舊技術有較大信心，心大心細，好慘呀！
* * * * *

幾個好朋友吃飽飯，踏著拖鞋走入7仔找雪糕吃，就好似返回住屋村的童年時代，以前出出入入的士多辨館，現在變成了OK。
* * * * *

大市跌過千點，生活也是如常。
* * * * *

好想買幾個架來放普洱茶，單是整齊是不夠，重點要通風嘛！
* * * * *

冬瓜麻雀已經投入服務，歡迎各雀腳報名決戰。
* * * * *

夏天，打邊爐的人真的比較少，但没減少我愛火鍋的熱情（實情係怕未來一個星期無得食牛肉，先下手為強）

宵夜

間中都有「食宵夜」的習慣。不要以為會跑到老遠搵食，其實多數都在家自己煮。

天氣熱會煮冷麵，冰箱隨時都要有冰塊，如果打開没有，會當場激死，灰爆！
公仔麵相信是多數人的選擇，麻油味和濃湯豬骨味都是熱門。
蝦子撈麵加幾滴麻油和陰油清，份量剛剛好，最適合作為宵夜。
甜品、水果都是經常選擇。
今日，吃了豆豉鯪魚炒油麥菜（自己炒呀！）加一碗麵豉湯拉麵，與同屋主作為宵夜，有點變態，但好happy！

**食宵夜會引致肥胖，各位朋友請審慎考慮後果，體重容易升而難跌呀！

心靜真係自然涼

中午一點開始，一件T-shirt，一條牛仔褲，行左四個鐘，中途要去既舖，九成都無冷氣，仲要灌幾十小杯熱茶，訂左幾箱貨，流左唔知幾多既汗。返到公司，只有死唔斷氣既冷風加把風扇，吹吹下。
下一場節目就到腫瘤科醫院探望同事仔N小姐，25歲，心臟有個瘤，今日唔知聽日事。連講野既力都已經無晒。突然，覺得自己練成左「大冰咒」既內功心法。熱咋嘛？唔駛死人架！唔好為你背脊既汗發痺氣，因為你仲可以有汗流，仲有街出呀！

Lawry's Part II - by 傻強

估唔到，我同傻強都寫左今晚既經歷．一齊分享下！！


今晚慶祝DD生日,
我地一行六女去左Lawrys食扒,
去到個環境都唔錯,
但一見到waitress D 制服,
作死咩? 好AV囉~
即係點? 咪扮野喇,
咪AV內waitress d制服囉,
男人見到應該很高興!

我地點完'精'後, (我果杯唔好飲, 好在我好口渴)
阿嘈想要杯暖水,
個AV女郎竟然話: 其實我地都有熱既飲品架~
我內心正在'小小小'.....

除左我之外, 佢地五個都食牛,
個AV女郎竟然叫佢地叫4份牛!!!
但又唔諗下一份有幾大舊架喎?!
我地懷疑佢係要交quota的......

到AV女郎sell湯既時候, 佢問我地飲唔飲TORN.......
TORN??????????
我地唔飲TORN架.......
到揀side dish喇......
我忍唔住講"" 我地要corn, 唔要torn!!""

廚師仔先生推架車到來切出prime rib, (車~ 成look好似kebab咁之嘛, 扮哂野~)
再隨手pad一pad 薯蓉落碟... 好瀟洒呀...
唔該... 你呢個動作留返去官塘飯堂先做啦好心~

對我黎講, 食物一般, 環境幾好, 服務值100個爛橙.
誠意推介比仇家們.

p.s. 雖然間餐廳很爛, 但都要多謝朋友們的安排, 因為我係勇於嘗試的傻強. 真心的~

Lawry's

好

Prime Ribs嫰滑，gravy 味道好。The Diamond Jim Brady Cut的厚度與質地都好好。比起薄切The California cut好吃。

魚扒煎得香，味道好。

沙律冰凍美味（但．．．在下段）

差

Service，十個差。

Server太硬銷，介紹就好似背書。提議五個人點四個Prime Ribs。你唔悶我都悶啦！小的有6oz，大的有16oz，點食呀大佬？！

選擇太少。如果你不吃牛肉，最好不要去。好悶的餐牌。

16oz厚切，server還說不是太大件，如果要鯨吞差不多500克的牛扒，再加side dish，只有發育時期的小朋友才可以做到。你有能本事再加甜品咖啡，同時都有潛質做300磅的肥仔。

以價錢去睇，可以用$300-$500消費一件牛扒的人，相信是重質，不是量，大大舊扒隊死人咩？

沙律標明用羅馬生菜，最後上碟是西生菜。（反而唔寫，我係OK架）

總結：唔會再去。都唔會介紹朋友去。&*%&%&$)&$%#$#@^　

仲要請朋友食飯，真係失禮晒！