嚇死人無命賠

今次去買新手機，附帶一個恐怖的背景故事，由CT被打劫而起。

CT星期五晚在深圳準備回港時遇上劫匪，(唔係小偷呀，係劫匪)。即係有四條友持刀，夾你上車，然後矇住你對眼，車到荒山野嶺，將你身上所有現金及貴重物品拿走之後，再要提款卡及密碼。如果大陸提不到錢，會扣留住人，安排香港接頭人到香港提款，你若果真是一名窮光蛋（如我），劫匪已表明，會將你掉到大海，乾手淨腳。

咁．．．．同我買新手機又有咩關係呢？因為我用的電話，是CT借我的後備電話，如今唯有收回來自用。

有錢係身就肉痛死，無錢係身上就即死。老土講句都要，錢財真係身外物，留番條命仔要緊！

朋友們的午飯選擇

屎豆的公司在灣仔會展大樓，每日到放飯時間就會好頭痛，要行去灣仔大街食餐飯就要行十五分鐘，一來一回就殺去半小時，一粒鐘真係去得邊到呢？迫不得已，唯有帶住家飯。住家飯本來都是相當筍，好可惜，他家中的出品向來是「嚇人」的。例如有鹹死人的豬肉，未炆熟的雞翼，帶有泥味的清蒸泥鰍等等。(屎豆，真係忍唔住，爆左你啲嘢出嚟！) 而屎豆的同事們會柯打外賣，如果由軒尼詩道送到去寫字樓，一碗四寶「湯」河就會變成「糊撈」，想用筷子夾都夾唔起。搵鬼食啦！

P公司在金鐘，金鐘出名難搵食。food court裝修時，中平價的選擇近乎零。一個打工仔，無理由去「唉倫山卡啦」擦一個自助午餐嘛！？

豬哥最幸福，身在銅鑼灣，選擇是最多，什麼菜式也有，午飯時間又不會太擠迫。西式午餐，坐得舒服，有湯、主菜、咖啡及甜品，都只需要$65。無投訴啦！

H&M vs Uniqlo

H&M
試身室排長龍，只有人摺衫而無招呼。如果你拿的牛仔褲不合身，麻煩自己出去再找，然後「再」排多一次那一條長到出門口的人龍。
要改褲?? Sorry, 這裡沒有改褲服務，簡單來說，是沒有服務。一條牛仔褲價值$249，你最好生得高大，否則再需要自己付款改褲長。

Uniqlo
沒有大排長龍的試身室，還有職員為你找適合的款式及呎碼，你在試身至試試下有唔妥，可以大叫職員幫你再找過。滿意後，當你一踏出來，他們會為你量度長度，還以極速為你改褲。『小姐，你條牛仔褲大約半個鐘後就可以拎番。』噢！實在太好！請問條褲幾錢呢？多謝 $249。

呀頂！不要再說我buy架仔，因為實在值得buy。

清一色

LF一舖十六不搭，原本都好開心。不久之後………



對手同屋主先生回敬一舖清一色，重要自模，還未止，他拉三莊，這舖牌已過百番。天啊！我只是一個閒家，唔出沖都一頸血呀！

有見識?

茶藝班的導師去了雲南探訪普洱茶山，而特地帶了一些有糯米香的小沱茶回來與我們試飲。小小一粒沱茶，就算被棉紙包著，都很容易聞到糯米香味。導師說因為製茶時加入一些糯米葉。

咦?!?! 原來糯米有葉架？
糯米葉又真係有糯米味喎？
我重以為糯米就好似一條稻穗，o的葉生係邊到架？

生於都市的我，似乎對各樣農產品都沒什麼知識。就算知道咖啡豆生於洪都拉斯而不是Starbucks，請問又有幾多人見過咖啡豆的真身呢？不如你問川久保玲、Marc Jacabs的新裝指標，又或者今期週刊狗仔隊拍到那一個名人，我反而答得更快。又話讀萬卷書不如行萬里路，都是吹水居多，放大假大多數都行萬里街，逛萬里商場，用萬萬聲的錢吧！
邊個話香港人有見識架？

新業主

Sensei已成為新業主，而這個耍樂軒選址MK。一來近伯母，二來又方便各位去打麻雀，地點極近太子仔的餐廳，很放心吧！

我已經認投了麻雀枱作為入伙禮物。他更講明需要摺枱，方便隨時開戰。手痕唔等得呀！

唯獨這個耍樂軒没有PR貓陪伴，如果各位有需要，屆時請自備。

飲茶日程

早餐 - 龍井，跟一份豐富早餐。
午餐後 - 任何青茶，最愛單欉。
晚飯中 - 凍茶，用來戒可樂。(出街食飯例外)
晚飯後 - 普洱茶，不能天天飲，因為我是窮人。

。。。

今日有一陣怪風吹到嘉年華的過山車都要停，困住幾個人，最慘未落到地之前要在車上受盡風雨。

媽媽感受到怪風立即打電話給我，怕我在青馬大橋被吹到飛落海。幾時我都是媽媽最掛心的一個呀！

* * * * * * * * * *

好想BBQ，但會熱死人嗎？
好想食牛扒呀！

單條的午餐

中區的午飯時間人好多，差不多每間餐廳都要排長龍，有時一個人就會避開高峰時間去吃午餐。如果人真的太多，間中會走到IFC買長法包回來配藍芝士，味道極強，吃得過癮。藍芝士味濃，吃兩件就到頂。如果再加一杯可樂或咖啡，吃的興起時，絶對生人勿近，除非附近都是壞人。

放心，我戒毒當中，無可樂呀！

腦震盪

時不時，身邊都會有人問一些，你從來無想過的問題。咦?! 呢ｄ係咪叫Brain Storming 呢？

午飯後泡茶時，o殊左隔離位同事一齊飲。

同事 : 喂，你一日都飲好多茶喎！
我 : 我無諗過呢個問題。
同事 : 點解你咁鍾意飲茶？
我 : 我唔鍾意飲水唧。
同事 : 你唔會瞓唔著咩？
我 : 唔會，怕疴夜尿多ｄ。
同事 : 唔!

肥米與同屋主

天氣暖，貓咪又開始脫毛，每日如身在仙境，最好不要遇著他們打鬥完畢，否則會更加利害。
講到貓仔開拖事件，就要提到肥米。一般，半夜裡是他們活動的時間，阿炮最愛追捕肥米，可能大家年紀相約，論輩份都叫咁上下嘛，但當肥米招架不住時，會跳上床避風頭，令到同屋主覺得肥米特別鍾意與他同眠，可能真的想想下就當真的原理，肥米最近與同屋主關係真的密切了很多。同屋主關燈入房，肥米必定會跟在後面。他上床蓋被，肥米即時躺在身邊，伴隨主人。
每次見到我都會唔抵得，但又會覺得好窩心啊！

戒毒

四月最好飲龍井，因為我貪新鮮。
春天新茶紛紛出籠。最趕飲的是龍井，新龍井有一份香，就好似剛剛炒過的杏仁，食完立即生飛滋，熱氣死你呀！好在….. 龍井是綠茶，它不會熱氣吧，而且有助清熱，你受得住最好一早啪番杯。
獅峰、梅家塢都鍾意。濫一點又何妨，一年只有這幾個星期。
多謝春天的新茶，這個星期我只吸毒兩罐(肥coke)，睇黎好快可以戒甩。什麼Zero都懶得試，就給我一杯2007的龍井吧！

Le Monde d'ulysse

中環街市有一間專賣法國食品的小店，有一日走過，見到店內有幾個位提供午餐，於是拿了名片，下次再幫襯。
以前曾經看過雜誌介紹這間小店，說老闆娘曾經在法國居住，熱愛法國文化之類(一定係咁寫o架啦)，所以總覺得小店會帶著誠意，做出法國風味。食就要快，這類小店都不知可以撐多久。
全店都不到十個位，迫到爆，要坐入座位，必先將就一下你的下半身，慢慢攝入去。午餐$130一位，包括頭盤，主菜。頭盤想要鵝肝要加$20-30，主菜想改食鴨腿又要再加$30，如果想餐飲點杯咖啡及甜品，再來多$20。午餐没有咖啡，有點不像樣呀呵。寧願你收$200包起我，讓大家都吃得暢快。

我的午餐點了鴨肝南瓜湯，熱到辣咀(我最鍾意食物夠熱)；鴨腿，鹹鹹香香，味道不錯。聽老闆娘說，逢星期五．六會有晚餐供應。
Le Monde d'ulysse
中環結志街9號地下
25262621

發作

每記掛住一個地方，通常是因為這個地方有一段美好的回憶。我簡單地做過統計，朋友間鍾意一個地方，主要是上次玩得開心，買得平，食得豪等等，所以久不久你會想再去這個地方覆桌，希望開心得以延續。
我又何嘗不是呢?
本來最近忙於分家及新工作，理應無暇去想傻事，但今日收到喪波的蛋糕和自家製果占，我又發作了！
實情我好掛住佢呀，掛住踩單車係新宿飛馳，掛住各位朋友來到我家打地舖，掛住去買牛肉回家shabu shabu(你地記唔記得果個等死人o既飯煲呀?)，更加掛住當時美好時光，無憂無慮。果一年，九成九係我行運！

橋底辣蟹

有一次跟蘇先生蘇太太在銅鑼灣搵食，找到鵝頸橋旁邊的橋底辣蟹，三個人食下一大堆餸菜之後，再來一碟豉油皇炒麵，蘇太太不斷強調，這個炒麵一定要食，最好再打包多一份，帶回家做宵夜（全部朋友都是暴龍）。食過之後又真係無錯，炒麵幼幼，而且不會太油膩，當晚就帶一份回家，給同屋主享用。闊別一段時間，同屋主突然提起炒麵，兩個人又再去擦一次。


今次點了幾個菜，大部份都很滿意，唯一椒鹽泥鯭味道普通，下次可以skip就是。最狂就是，當日兩個人，四個菜再加兩個豉油皇炒麵（係呀，兩份!!! 一份堂食，一份外賣做宵夜）只消費$215，抵到爆！

橋底辣蟹
駱克道 405地下
28931289

殺入深圳

記憶之中，已經有兩年多沒到過深玔（無錯！很勾嘛）。今次來到專程探訪DD的渡假屋，幾百呎的渡假別墅招呼過無數親戚朋友，所以DD已經有相當經驗，由搵食地點至屋內麻雀耍樂都安排妥當。最爆的是，一房一廳的房間，最多的是被褥，足夠容納十個八個人，感覺就好似去宿營。

深圳二十六小時，首站先到illy嘆下午茶。以Food Court來講，賣相及質素都算不錯，這裡是中國，咖啡始終都不是主流，平常心吧！

再回到家中，中場竹戰兩圈，主打是食糊（又係食啦當然），然後到華僑城的漁舟暢碗吃晚飯（這個名如果沒有卡片的話，我肯定無法記起，好難記的店名），五個人八個菜，好食的全部幹掉，留下來是不想放入口的。

最有印象的是粉絲煲及黃金蝦，粉絲煲的粉絲粉很乾身，很對味；而黃金蝦沒有太多的鹹蛋黃，就是做得剛剛好。

晚飯後再續戰，最後以超級市場點心作為甜品，今日完。

第二日先去飲茶，九個點心先來做頭盤，埋單成為RMB85，再看看餐牌，點心只收RMB3.8一碟，怪不得香港人都來到這裡消費。
早餐的下半場就殺到萬像城的江南廚子。來這裡為的是老鴨湯，湯很濃，鴨也不騷，湯裡的金華火腿，一咬就化開，好想打包一份帶回家。

小籠包比起外面的味較濃，湯汁稠稠的，雖然P就吃不消，但我就吃的過癮。這班暴龍居然晨早流流還食多一個蜜汁火方，真係精神病。

全程總消費，每人RMB200 (包括車費) ，真係人都癲!!!

雲咸街

雖然常在中環出沒，但少有行上雲咸街，今次因要辦事而來。專程由行人電梯那邊走過去，發現有不少新餐廳於兩旁(相信已有一段時間，只是我比較勾)，而且大部份都是一班嘆午餐的老外在店內。假日的中區，就是這樣的休閒，感覺良好。

途中見到一間餐廳，她有一個很吸引的店名，心好想試一試。

同屋主 : 呢個名咁熟既? 呢個字點解呢? 真係好面善喎！

我 : 頂！你玩野咩，和牛嘛。

同屋主 : 呀! 係喎，和牛嘛。不如過去食，睇佢有咩牛食 (一支箭飛去門口睇餐牌)

同屋主 : 你唔駛過o黎!!! (超大聲從對面馬路叫回來）

我 : 吓！咩事呀，好貴咩？

同屋主 : 唔係！癈事你入去講粗口啦！

我 : 真係貴到要講粗口？

同屋主 : 唔係！佢成個餐牌，都無和牛咋嘛！（當時佢十分冷靜的）

我 : 頂！學咩Q人改個名叫Wagyu呀！%$@#

早餐怪習慣

早餐對我來講都是每日的重要開始，而且我有一個怪習慣。一起身最好就先飲一杯清水再加水果，水果份量不定，有時季節時令是我喜歡的水果時會多食幾款。蘋果是每日必備，再加奇異果、木瓜、梨、士多啤梨、菠蘿等等，食到夠為止。如果趕時間，水果餐就算。一般情況許可之下，會來多一個Part 2，有蕃茄芝士火腿多士，又或者餐肉雞蛋配多士、咸麥皮、水餃、點心、茶餐廳等等。視乎心情而決定。但每次要離開香港時，就必須要妥協一下。有時你住的地點不一定有超級市場在附近嘛！又或者一大班朋友去旅行，長時間處於作戰狀態，點會有心機跟你去買水果呢?

忌廉炒蛋

早幾天與屎豆去過澳洲牛奶公司食宵夜，這幾天他不停地大叫「好掛住個炒蛋呀！」而傻強又加把咀時，星期日有以下早餐推出．各位麻雀腳下期歡迎柯打．

烏崠單欉＋合桃麵包＋忌廉炒蛋配火腿

忌廉炒蛋材料：雞蛋2隻 (細蛋約100克)．淡忌廉 30克．鹽 + 胡椒各少少

炒蛋時油要多，你怕油就難煮得好．7-8成熟上碟

再戰生記

早幾日與傻強到生記，由於人丁單薄，好多小菜都未能試食．今次借P的生日就約齊人馬再次出戰。


一間給電視雜誌都介紹過的飯店，果然人山人海．想討個位就必先要提早預訂。今次訂位就早有準備連小菜都一並訂好，一到場就開飯．殺呀!!!!


上湯枸杞浸豬潤 ．薑蔥砂鍋豬潤．豉油王煎蝦碌 ．生炒牛肉飯 ．梅子蟹．生炒排骨．椒鹽鮮魷 ．泥鯭粥．梅菜蒸菜心．白糖糕。

上次最令深印象的豬潤，今次就差遠，煮得過熟，又或者太薄，欠缺creamy質地．為再多給一次機會，再上一小鍋薑蔥豬潤，可惜都同樣是強差人意。其他菜式就普普通通．終是找來上次侍應uncle問一問，他服務仍然有禮，回覆的是可能今天假期，廚房較忙，未能做到100分。@_@ 點搞呀?!?!


晚飯食得過飽，回家都要泡一杯普洱來幫助消化 (加速胃部郁動，好似停咗!)


Tips : 吃的油膩要飲普洱茶，吃甜品後就飲綠茶．普洱茶去脂去油，綠茶就降糖。