小生意的日常

每朝十點半起床（有時都會十一點至起身），沖涼洗頭搞呢搞路半個鐘啦，就食一大堆水果做早餐，然後返工。
開車由屋企到公司，只需十二分鐘，準時十二點殺入黃金時段。鬼佬都早開工，早食晏，十二點到一點最忙，之後就會輕鬆好多，兩點之後，真係人影都無多幾個。
收拾好之後，兩點半全餐廳員工都一齊食午餐，大約三點就會離開公司。
中場時間，有時會去海邊飲咖啡，晒太陽，有時會返屋企瞓一陣。總之五點半至六點就返餐廳開工，準備晚飯餐期。（當然廚房同事比我早返工準備啦！）
如常袋鼠國的人民都愛早起早睡，晚飯最多九點就完。（同人唔同命呀，香港做餐廳，好多客人九點至黎食飯，仍然係十一點啲客都未食完晚飯架！）九點半就準備晚飯，大家坐埋一齊食。
我最鍾意大廚為同事準備既福食，每餐都唔會馬虎。
先介紹下今晚果餐飯食咩先．．．
粉絲蝦米蒸蛋
上湯煮芥菜，無農藥芥菜，出自大廚個garden，死未！
清蒸三文魚骨腩（今朝專程去街市買比佢整）
香茅鮮豬排，香茅由大廚garden種出，新鮮到極
綠豆沙

相比起香港果位大廚，又比你睇下食咩啦．．．
公仔麵加旦
白烚椰菜，一係咸死人，一係無味
油雞／白切雞（外賣貨式）
有時會外賣pizza
通常都自己去翠華食就算，咩心機都無。
唔好以為香港個廚煮飯唔好食，係佢無心機搞員工福食咋，香港人點都覺得，返工只係煮比客食，福食果一餐係額外工作，無心裝載囉。